Ljetovanje iz godine u godinu, čini se, predstavlja luksuz jer cijene smještaja i hrane neprestano rastu. Prema istaživanju portala Mondo najjeftinije je u Sutomoru i Čanju dok za Budvu treba izdvojiti pozamašnu svotu novca.
Jedna od ponuda koju nudi turistička agencija jeste hotel sa četiri zvjezdice i čija je cijena 29 eura po danu po osobi tako da bi vas za 10 dana smještaj izašao 290 eura. Ova cijena važi za putovanje van sezone, a u sezoni hotel košta 60 eura po osobi, po danu. Hotel se nalazi u Sutomoru, posjeduje otvoreni bazen i teretanu. Korišćenje plaže, suncobrana i ležaljki je besplatno.
Ista agencija nudi i apartmane u mjestu Dobre Vode koji su ocijenjeni sa tri zvjezdice i cijena je 35 eura po osobi po danu. Pošto je to hotel apartmanskog tipa, u ovu cijenu je uključen i polupansion. Ova cijena važi za jul i avgust mjesec.
U hotelu u Budvi deset dana košta 1.264 eura u avgustu mjesecu. Cijena je za dve osobe. Hotel je sa tri zvjezdice, a u cijenu je uključena polupansionska usluga. Cijene su još više u hotelima sa četiri i pet zvjezdica, pa se kreću od 1.400 eura, pa sve do 2.760 eura za dvoje. Uključeni su noćenje i doručak u ovu cijenu.
U Bečićima su cijene malo niže, pa ćete smještaj za dvoje, deset dana u julu mjesecu platiti 900 eura u hotelu sa tri zvjezdice. U cijenu je uračunat i doručak. U Rafailovićima je cijena malo viša, tako da ćete za hotel sa tri zvezdice platiti 1.200 eura za 10 dana.
Što se tiče privatnih smještaja, jako je teško naći smještaj blizu centra i plaže za “pristojne pare”. U Herceg Novom u avgustu najpristupačnija cijena apartmana je 350 eura za 10 dana. Nalazi se na kilometar od plaže i osam kilometara od centra.
Drugi apartman koji je takođe pristupačan sa cijenom nalazi se na tri km od centra i košta 377 eura za 10 dana. U Sutomoru je cijena za 10 dana za apartman na plaži 350 eura i nalazi se na 300 metara od centra. Što se tiče smještaja u Tivtu, najjeftiniji smještaj, a da je blizu mora košta 600 eura. U pitanju je apartman i nalazi se na 700 metara od centra.
Za 320 eura 10 dana možete da provedete u apartmanu u Čanju. Nalazi se na 650 metara od plaže i 700 metara od centra.
(Adria.tv)
