Iako je mađarska OTP banka još u maju ove godine stekla stopostotni udio u Splitskoj banci, konačno spajanje ovih dviju velikih banaka dogodiće se za desetak dana, tačnije 1. decembra.

Da se veliko pripajanje bliži finalu svjedoče i nove boje i oznake na bankomatima i poslovnicama, koje su redom pozelenjele u tipičnoj OTP boji.

Iako se o ovom velikom “braku” već mjesecima govori, a obje banke tvrde da o tome redovno informišu i svoje klijente, građani ipak imaju još puno nedoumica oko toga. Posebno ih, međutim, brine najava da početkom decembra zbog pripajanja neće raditi poslovnice banke, piše Slobodna Dalmacija a prenosi Jutarnji list.

Silvija Bareša, direktorica Kabineta uprave i komunikacija Splitske banke, ističe da njihovi klijenti nemaju razloga za brigu, te da poslovnice praktično neće raditi samo dva radna dana zbog pripajanja. Tvrdi i da su preduzeli sve moguće da ova tranzicija prođe što “bezbolnije” za mnogobrojne korisnike njihovih usluga.

“Radi se o najvećoj integraciji dviju banaka ikada sprovedenoj u Hrvatskoj i u pitanju je jako opsežan proces koji iziskuje korišćenje različitih resursa. Rezultat će biti formiranje četvrte banke na području Hrvatske, koja će imati svoje sjedište u Dalmaciji, te dominantni položaj na cijeloj obali i prisutnost u svim regijama Hrvatske, s više od 11 odsto tržišnog udjela”, kaže Bareša.

Rezultat integracije: pola miliona klijenata

Kad se početkom decembra to veliko spajanje dviju banaka, Splitske i OTP-a dogodi, nastaće četvrta po veličini banka u Hrvatskoj, koja će imati više od 130 poslovnica, 400 bankomata te više od pola miliona aktivnih klijenata.

Izvor: Jutarnji