Kripto zima i službeno je završila. Raspadnuta carstva i sudske drame daleko su iza nas. Oni koji su preživjeli postali su snažniji, a u budućnosti vide pravu zlatnu groznicu.
Nakon godina sukoba s američkom Komisijom za hartije od vrijednosti i berzu (SEC), bitkoin i druge kriptovalute napokon su stigle na velika vrata. Od sredine decembra, američki bitkoin ETF-ovi imali su 126 milijardi dolara imovine, što je više od ETF-ova u zlatu (125 milijardi dolara), pokazuju podaci norveške kompanije K33 Research.
Postizborni koktel tržišne euforije i Trampovih obećanja da će SAD učiniti “kripto prijestonicom svijeta” i osnovati strateške rezerve bitkoina donio je uzlet vrijednosti te kriptovalute na preko 100.000 dolara.
I solana je u uzletu, i to na krilima popularnosti mim koinova (meme coin) i novih kategorija poput mreža koje iskorišćavaju blockchain tehnologiju za decentraliziranje kontrole i vlasništva fizičke infrastrukture. Platforme poput Polymarketa, gdje su se korisnici kladili na ishod američkih predsjedničkih izbora, kao i igra Off The Grid, pronašli su uspjeh u mejnstrimu.
Kriptovalute su ušle u opštu svijest
“Ovo je godina u kojoj je kripto ušao u opštu svijest na način koji nije zabilježen od 2021. godine, a sada je to dugoročna održiva imovina koja će nešto značiti,” kaže Rob Hadik (Rob Hadick), generalni partner u kompaniji za ulaganja u kripto, Dragonfly. “Ako gledate samo efekt koji je kripto imao na izbore – i iz perspektive donatora i iz perspektive zakona i obećanja predsjedničkih kandidata – to je nešto što se nikada prije nije dogodilo. Očito je to bio velik korak ka legitimizaciji.”
Tramp i njegov tim zvaničnika prijateljski nastrojenih prema kriptovalutama spremaju se preuzeti vlast i sve je spremno za ono što insajderi već nazivaju “zlatnim dobom kriptovaluta.”
Evo sedam prognoza:
Novi rekordi i američke rezerve bitkoina
Umjetnost odvažnih prognoziranja cijena ponovo je u modi. Kopanija za upravljanje kripto imovinom Bitwise predviđa da će, u slučaju da SAD kreira strateške rezerve poput onih za naftu i zlato, cijene bitkoina dosegnuti 200.000, a možda i 500.000 dolara.
Tramp je već predlagao da se 200.000 bitkoina zaplijenjenih kriminalcima (u vrijednosti 21 milijarde dolara) iskoristi za osnivanje rezervi. Ipak, pravni okvir je mutan – hoće li nešto takvo zahtijevati odobrenje Kongresa ili izvršna vlast može postupati samostalno? Skeptici tvrde da bi nestabilnost kriptovaluta mogla potkopati finansijsku stabilnost, a dodatni sloj misterije stvara i Trampova šutnja po pitanju toga hoće li SAD kupovati bitkoin na otvorenom tržištu.
Regulatorni reset
Dolazeća američka administracija mogla bi biti dosad najpozitivnije raspoložena prema kriptovalutama.
“Postoje stvarne prilike da se uvedu odlične politike za industriju,” kaže Kristin Smith, izvršna direktorica Blockchain Associationa koji predstavlja više od stotinu kripto kompanija. “Bijela kuća sugerisala je da je to prioritet. Mislim da ćemo vidjeti kombinaciju koraka u čitavoj vladi i zakonodavni iskorak u smjeru tržišne strukture i stejblkoinova (stablecoin) (kriptovalute čija je vrijednost vezana za stabilnu imovinu). Mnogo inovacije vratiće se u SAD,” dodaje ona.
Novi izlasci na berzu i dostupni kapital
Raste broj inicijalnih javnih ponuda u kripto industriji. Bitwise imenuje pet kompanija koje će sljedeće godine vjerovatno izići na berzu:
– Circle – Izdaje najveći stejblekoin u svijetu, USDC
– Figure – Poznat po finansijskim uslugama zasnovanim na blockchainu
– Kraken – Američka kripto berza koja o IPO-u razmišlja još od 2021.
– Anchorage Digital Status – ove kompanije kao federalno ovlašćene banke mogao bi olakšati IPO
– Chainalysis Lider- u uslugama blockchain usklađivanja
“Očekujem da će tržište ograničenih društava postati bolje – željeće uložiti više kapitala u kripto. Već sada to vidimo u određenim segmentima poput stejblkoinova i isplata,” kaže Hadik iz Dragonflyja.
Ulasci na velike indekse
MicroStrategyja prošle su godine porasle više od 400 posto. Sada je kompanija uvrštena u Nasdaq 100, a analitičari očekuju da slijedi uvrštavanje i u S&P 500, i to zahvaljujući novim pravilima koja omogućavaju kompaniji da svoje bitkoin investicije u finansijskim podnescima odražavaju po tržišnoj vrijednosti. Ta promjena mogla bi dovesti do uvrštavanja MicroStrategyja u fondove koji prate indekse, a samim time i portfelje ogromnog broja investitora u SAD-u. Analitičari kažu da bi se indeksu S&P 500 uskoro mogao pridružiti i Coinbase, koji je prošle godine rastao 70 posto.
Rast stejblkoina
Sektor stejblkoina očekuje eksplozivan rast i potencijalno udvostručenje tržišne kapitalizacije na 400 milijardi dolara uslijed očekivanja uvođenja legislacije stejblkoina u SAD-u. Prošle godine je obim transakcija stejblkoina dostigao 8,3 biliona dolara, gotovo dosegavši obim isplata Vize (Visa) od 9,9 biliona dolara, pokazuju podaci Bitwisea.
Tether i Circle još su najveći igrači. Ipak, ako nastave poslovati više kao upravitelji imovinom, a ne kompanije za plaćanja, njihov rast uskoro bi mogao stati, upozorava Hadik.
Strajpova (Stripe) kupovina stejblkoin platforme Bridge u oktobru za 1,1 milijardu dolara, poslala je poruku: stejblkoin bi mogao postati kamen temeljac fintecha. Strajp ga naziva “supervodičima za finansijske usluge” i naglašava njihovu nevjerovatnu brzinu, niske troškove i globalni doseg. Robinhood ne zaostaje, a razmišlja o globalnoj mreži stejblkoina.
Ubrzana tokenizacija
Izvršni direktor BlackRocka Leri Fink (Larry Fink) već godinama zagovara tokenizaciju. Od nekretnina do umjetnosti, sve bi uskoro moglo imati svoj token. Velike koristi su instantne nagodbe, niži troškovi u odnosu na tradicionalne, stalna likvidnost i transparentnost.
Prije tri godine, kripto sektor tokenizovao je samo 2 milijarde dolara imovine, uključujući privatne kredite, američki dug, robu i dionice. Danas je taj iznos bliži 14 milijardi dolara.
Nove aplikacije i bolja infrastruktura
Najpopularnija fraza u posljednje vrijeme sigurno je “AI agenti.” Treba biti spreman na spajanje vještačke inteligencije i kriptovaluta na način koji će podsjećati na naučnu fantastiku.
Prve naznake ovog trenda već polako postaju vidljive. TruthTerminal – AI agent koji je dobio 50.000 dolara od Marka Andrisena (Marc Andreessen), a uz to i sam postao milioner iskorišćavanjem društvene platforme X. Uspjeh TruthTerminala temelji se na promovisanju koina zasnovanog na glupavom starom mimu.
Ipak, analitičari su oprezni. Praktični AI agenti – na primjer oni koji pokušavaju izvesti kompleksne transakcije u blockchainovima u ime korisnika – rijetki su i u ranoj fazi. “Agenti su uzbudljivi jer su novi,” kaže Ceteris, čelnik istraživanja u njujorškoj kompaniji za kripto analitiku Delphi Digital. “Ali oni će vjerovatno biti najveći balon ovog ciklusa, i u dobrom i u lošem smislu.”
I u tren, priča oko kriptovaluta napravila je zaokret od preživljavanja do euforije. To je samo početak onoga što bi 2025. godina mogla donijeti. Na svima je izbor: hoćemo li posmatrati ili pokušati iskoristiti priliku. Oprez je najvažniji. Tržište će ići od uzleta u nebeske visine do padova u najmračnije ponore, a ovog puta se čini da su ulozi veći nego ikada.
(Izvor: Forbes)
