Telekom Austria, koji je dijelom u državnom vlasništvu, ima novog lobistu na platnom spisku, bivšeg makedonskog ministra za informaciono društvo Ivu Ivanovskog.

Od septembra 2016. godine Ivanovski vodi “Međunarodnu regulativu i evropske poslove”. U petak je predsjednik Uprave Telekoma Austria Alejandro Plater kazao zaposlenim da će Ivanovski takođe voditi područje “Spajanje i akvizicije”, prenosi bečki Standard pisanje Press-a.

Angožavanje političara, koji je uz to bio nadležan za telekomunikacije, naišlo je na kritike u Austriji.
Predstavnica Zelenih u Parlamentu Gabriela Moser postavila je pitanje da li je angažman u skladu s pravilima u Telekom Austria.

Bivši revizor Franz Fiedler, sada počasni predsjednik Transparency International u Austriji, kaže da je problematična tranzicija političara u kompaniju, koja je bila dio njegove nadležnosti. “Da je Ivanovski bio ministar sporta, stvar bi bila drugačija. Ali pošto je on bio zadužen za telekomunikacije, to je neodrživo“, rekao je Fiedler.