Predstava „Ženidba“, Nikolaja Vasiljeviča Gogolja u režiji Egona Savina, u koprodukciji sa Kraljevskim pozorištem Zetski dom biće izvedena u ponedjeljak 25. decembra u 20 sati na Velikoj sceni, a u utorak 26. decembra u Kraljevskom pozorištu Zetski dom.
Adaptaciju teksta i dramaturgiju uradila je Stela Mišković, kostimografiju Jelena Stokuća a scenografiju Vesna Popović.
U predstavi igraju: Nada Vukčević, Zoran Vujović, Dejan Ivanić, Varja Đukić, Nikola Perišić, Gojko Burzanović, Aleksandar Gavranić, Goran Vujović, Olivera Vuković, Stevan Radusinović i Radmila Čolić.
„Predznak savremenog svijeta su slobode. Sloboda izbora, sloboda govora, sloboda odlučivanja, sloboda misli, sloboda djelovanja, sloboda u užem smislu, sloboda u širem smislu.. Slobode kao množina na uštrb, nekad nužno potrebne Slobode kao jednine. Sve te slobode predstavljaju kvazipobjedu u borbi protiv konvencija i stereotipa kojima se čovjek želi ograničiti. Ova predstava progovara o toj borbi, o gušenju pojedinca u normama i okovima društva, o sputavanju vlastite prirode i pokušaju šablonskog života, licemjerju kao nužnosti takvih odluka, osnosno oslobađanju od tih stega i cijeni koja se usput plaća. Cijeni slobode.“
Dramaturškinja Stela Mišković
